శ్రీ మధురాపంతుల రమణమూర్తి శ్రీమతి రాజ్యలక్ష్మి గార్ల వివాహ రజతోత్సవ వేళ నేను రాసిన సన్మానపత్రం 

శ్రీ సతి వక్ష మందు గల చిన్మయ రూపుడు ఎల్ల వేళలన్ 
ధీ సముపేత యుక్తమగు దివ్య కటాక్షము చూపుచుండగా 
భాసుర లీలతో తమకు భాగ్యము నాయువు నిచ్చు వేడుకన్ 
సేసల నిచ్చి గాచు నిక సద్గతి నొందగ మానవోత్తమా 

సమస్య: చెడు పేరున్నది మిత్రమా ప్రజలలో శ్రీ శ్రీ కవిత్వానికిన్

 
నా ప్రయత్నం: మత్తేభం 

కడు దీనాత్ముల బాధలున్ తనవిగా కారుణ్య భావమ్ముతో 

బడ బానానల రీతి రెగేడు వచో పారిణతన్ ధీరతన్ 

చెడు పై  యెత్తిన రక్త కేతనముగా జేగీయమైనట్లు తో 

చెడు పేరున్నది మిత్రమా ప్రజలలో శ్రీ శ్రీ కవిత్వానికిన్ 

పోతన పద లాలిత్యం

మెరగు చెంగట నున్న మేఘంబు కైవడి 

           ఉవిద చెంగట నుండ నొప్పు వాడు

చంద్ర మండల సుధా సారంబు పోలిక

           ముఖమున చిరునవ్వు మొలచువాడు

వల్లీ యుత తమాల వసుమతీజము భంగి

            పలు విల్లు మూపున వరగువాడు

నీల నగాగ్ర సన్నిహిత భానుని భంగి

            ఘన కిరీటము తల గల్గువాడు

పుండరీక యుగము బోలు కన్నులవాడు

వెడద యురము వాడు విపుల భద్ర మూర్తి 

వాడు రాజ ముఖ్యు డొక్కరుడు నా 

కన్నుగవకు నెదుర గాన బడియె 

- పోతన భాగవతము 

దత్తపది

మార్చి, కూర్చి, ఆర్చి, వార్చి - ఈ పదాలతో భాగవతార్ధములో దత్తపది - నా ప్రయత్నం :


హరి! యేమార్చితి వీవు బాలకునిగా హాసమ్ముతో యెల్లరన్
మురళీ గానము నందు కూర్చితివిగా మోహంపు జీవాత్మలన్
కరుణా మూర్తివి గాను ఆర్చితివిగా కౌంతేయు లాపన్నతల్
పరమాత్మా! సరి వార్చి యున్న నను నీ పాదమ్ములన్ జేర్పవే 


(వార్చి యుండుట = వేచి యుండుట అని అర్ధం) 

సొంత కపిత్వం

యోహాను, మేరి, ఏసోబు, బెత్లహాం - ఈ పదాలతో "కరుణ నేలకు దిగివచ్చిన శుభ వేళ క్రీస్తు సందేశాన్ని" నచ్చిన ఛందస్సులో రాయాలి.  పై దత్తపదికి నేను చేసిన ప్రయత్నం: 

వర యోహాను సువార్త సత్యమగుచున్ విశ్వమ్ము హర్షింపగా

పరి శుద్దాత్మను గర్భ మందిన మహా పుణ్యాంగనౌ మేరికిన్

సరి యేసోబున కుద్భ వించె భువిలో సత్యమ్ము మార్గమ్ముగా 

కరుణా సింధువు బెత్లహాం పురమునన్ కైమోడ్పులందింపుడీ

హృద్యమైన పద్యం

జారుల జూచి వందనము సల్పిరి భక్తులు ముక్తికాంక్షతో

- ఈ సమస్యకు జంధ్యాల పాపయ్య శాస్త్రి గారి పూరణ: 

కోరిక దీర మ్రొక్కుకొని కొండ పయిన్ శివ రాత్రి నాడు జా

గారము చేసి దీపముల కాంతులలో నవ వారి పూర గో

క్షీర మధు ద్రవాల నభిషేక మొనర్చెడి స్వామి వారి పూ 

జారుల జూచి వందనము సల్పిరి భక్తులు ముక్తికాంక్షతో